Ekspresi narsis-ku

Ku Popon Saadah

Geus aya kana samingguna kuring hulang-huleng, mikiran saha jelemana nu pirajeunan ngaheureuyan ngaliwatan SMS. Teu sirikna unggal poé murudul sms ti jelema nu masih kénéh misterius téh. Nu matak hélok, siga-siga jelema nu geus loma, maké jeung nyaho nomer HP jeung nyaho kuring ngajar di SMP 4 sagala. Ana ditanyakeun ti mana meunang nomer HP jeung ti mana nyaho kuring ngajar di ieu sakola, jawaban manéhna: jaman kiwari mah maluruh raratan hiji jalma téh éstu perkara gampang, cenah. (more…)

Ku Popon Saadah

Basa Ki Sobat ngajak ngahadiran seminar Motivasi di kantorna, kuring haget pisan nyanggupan. Lain pédah ayeuna keur usum Buser (berburu sertifikat) keur sertifikasi guru, lain. Da teuing aya sértifikatan teuing euweuh éta seminar téh. Kabita hayang milu hadir sotéh pédah wé ieu mah gratis. Padahal cenah mun ieu seminar dilaksanakeunana di hotél-hotél berbintang mah peserta téh kudu mayar nepi ka tilu ratus rébuna. Asa lebar. Najan narasumberna tokoh nu keur ngetop ogé, keukeuh wé lebar mun seminar kudu mayar mah. Asa mending kénéh dibeulikeun deungeun sangu tah duit tilu ratus rébu téh, bisa keur deungeun sangu saminggueun meureun. Hayang sidik wé deuih pangpangna mah, nu mana Andrie Wongso Andrie Wongso nu rék jadi narasumber tunggal dina éta seminar téh, ulah ngan ukur nyaho tina buku-bukuna wungkul. (more…)

Sukma urang marakayangan
na rasa nu kumacacang
tingkalayang néang pangeunteupan pangreureuhan
nu kamari kungsi kasorang
babarengan

Tapi teu kaur ngaringkang
rumengkog balas teu weléh rumanjug
ras inget paniatan nu geus gilig
moal deui rék silih jugjug
najan ukur silih jugjugan lelembutan

Kapan geus sapuk rék pada-pada nyasaak
tapak lacak nu kungsi katincak
malar janglar silih tilar
palias gering nangtung ngalanglayung

Sukma urang marakayangan
na rasa nu kumacacang
bari pada-pada rébo ku rasa sumoréang
maluruh jalan sorangeun séwang-séwangan
wayahna sosoranganan

ka anjeun nu kungsi mihéman
mihapé rusiah haté
simpen masing paringpen
na lolongkrang rasa nu pangbunina
nu arang kasorang najan ku kalangkang urang
sina jadi prasasti nu ngancik na sanubari
ngadaun lontar nu méré iber
yén kuring jeung anjeun kungsi pataréma rasa
dina hiji mangsa

salira nya kingkilaban téa
ngaburinyay sakedapan
na poék mongkléngna peuting

kana gumuruhna guntur
kana gelebug jeung séorna angin
abdi seja titip kangen
manawi salira kersa némbongan
nepangan dina impénan

Nya anjeun pisan nu mulas kanvas haté kuring ku pulas kayas
nepi ka sukma katambias
di basisir tresna pangreureuhan kuring jeung anjeun
nu geus lawas ngan ukur bisa diwawaas
tétéla duriat urang moal rék laas

lir katumbiri
salira awis katinggal
sesah pisan dipilari
arang langka kawénéhan
dina sakali némbongan
diri teu weléh kapati-pati…

Horéng anjeun téh aya na jentréng kacapi
na gelikna sora suling
na wirahma angin peuting
na kolébatna balébat
na hibarna sariak layung
na koléangna kalakay gupay
na galura rasa sono kuring…