Ekspresi narsis-ku

April 18, 2009

Deudeuh teuing…

Filed under: Puisi

Deudeuh teuing sawah kuring
bangun nu ngahurun balung
bingung dibarung ku linglung

Sabab sakuriling bungking
dikepung pabrik jeung gedong
kaayaan jadi aheng
teu weleh gandeng harengheng

Sawah siga nu marudah
pare teu daekkeun gede
pundung taya nu malire

Taya bondol reujeung piit
nu sok rabeng bari ngawih
atoh nyanghareupan panen

taya bebegig ngarigig
da puguh manukna euweuh
saung ranggon kari ngaran

Hayang aya di bihari
jaman jumeneng nini aki
sawah ngeplak satungtung deuleu
estu matak deungdeuleueun

Tapi kuring aya di kiwari
moal manggih deui kamari
kawaas ukur waasna
katineung ukur nineungna

Deudeuh teuing anak incu kuring
leungiteun tapak karuhun
sawah nu kuduna diwaris
rea nu geus salin jinis

robah rupa jadi imah
jadi pabrik jeung pom bengsin
sarta jadi supermarket

Deudeuh teuing anak incu kuring
jaga bakal loba nanya
beas kumaha nyieunna?
sarta di mana pabrikna?

3 Comments »

The URI to TrackBack this entry is: http://pop.blogsome.com/2009/04/18/deudeuh-teuing/trackback/

  1. Deudeuh teuing anak incu urang, jigana moal kaalaman ku maranehna ancrub ka sawah bobolokot ku letak, moal ngalaman ngahembatkeun pacul nu nyeceb pageuh na leutak. Aneh ningali munding nu nungtun wuluku, aheng ningali nu ngagarisan sawah make garu. Bakal olohok mencrong nu ngalungkeun binih pitandureun, ngabarakatak nyaksian nini-nini nu naronggeng nyecebkeun binih, peupeureudeuyan mun seg neuteup nu ngarambet, ting haruleng ningal nu dibuat jeung nu ngirik, sumawona kacida heranna ningali pare nu robah jinis jadi beas alatan ditutu….Tah jang/nyi kitu prosesna nyieun sangu teh nu unggal poe dicelebekkeun ku hidep :-D

    Comment by gajah_kurus — April 18, 2009 @ 8:22 am

  2. Abdi prihatin, barudak ayeuna seuseueurna mung wanoh kana hal nu serba instant, ku kituna teu patos ngahargaan kana “proses”. Nuhun pisan kana komentarna.

    Comment by pop — April 20, 2009 @ 7:24 am

  3. abdi mah meulang, seueurna patani teh tos sarepuh….saha anu neuraskeun tani nya?

    Comment by Bambang — August 16, 2009 @ 4:09 am

RSS feed for comments on this post.

Leave a comment

Line and paragraph breaks automatic, e-mail address never displayed, HTML allowed: <a href="" title=""> <abbr title=""> <acronym title=""> <b> <blockquote cite=""> <code> <em> <i> <strike> <strong>























Get free blog up and running in minutes with Blogsome
Theme designed by Minz Meyer